75 Əl-Qiyamə surəsi
بسم الله الرحمن الرحيم
Mərhəmətli, rəhmli Allahın adı ilə!
75:1
لَا أُقْسِمُ بِيَوْمِ الْقِيَامَةِ
And içirəm qiyamət gününə;
75:2
وَلَا أُقْسِمُ بِالنَّفْسِ اللَّوَّامَةِ
And içirəm (günah etdiyi üçün, yaxud yaxşı əməli azdır deyə) özünü qınayan nəfsə! (Siz öləndən sonra mütləq diriləcəksiniz!)
75:3
أَيَحْسَبُ الْإِنسَانُ أَلَّن نَّجْمَعَ عِظَامَهُ
Məgər insan elə güman edir ki, (qiyamət günü) onun sümüklərini bir yerə yığa bilməyəcəyik?!
75:4
بَلَىٰ قَادِرِينَ عَلَىٰ أَن نُّسَوِّيَ بَنَانَهُ
Bəli, Biz onun barmaqlarını da (barmaq sümüklərini də, barmaqlarının uclarını da) düzəltməyə qadirik!
75:5
بَلْ يُرِيدُ الْإِنسَانُ لِيَفْجُرَ أَمَامَهُ
Lakin insan (bundan sonra da) önündəkini (qiyaməti) danmaq (pis işlər görmək) istəyər.
75:6
يَسْأَلُ أَيَّانَ يَوْمُ الْقِيَامَةِ
Və (istehza ilə): “Qiyamət günü nə vaxt olacaqdır?” – deyə soruşar.
75:7
فَإِذَا بَرِقَ الْبَصَرُ
Göz (heyrətdən) bərələcəyi;
75:8
وَخَسَفَ الْقَمَرُ
Ay tutulacağı;
75:9
وَجُمِعَ الشَّمْسُ وَالْقَمَرُ
Günəşlə ay birləşəcəyi (hər ikisinin qərbdən çıxacağı, nurunun gedəcəyi) zaman –
75:10
يَقُولُ الْإِنسَانُ يَوْمَئِذٍ أَيْنَ الْمَفَرُّ
Məhz o gün insan: “Qaçıb can qurtarmağa yer haradadır?” – deyəcəkdir.
75:11
كَلَّا لَا وَزَرَ
Xeyr, (o gün) heç bir sığınacaq olmayacaqdır!
75:12
إِلَىٰ رَبِّكَ يَوْمَئِذٍ الْمُسْتَقَرُّ
O gün (ey insan!) duracaq (pənah aparılacaq) yer ancaq Rəbbinin hüzurudur!
75:13
يُنَبَّأُ الْإِنسَانُ يَوْمَئِذٍ بِمَا قَدَّمَ وَأَخَّرَ
O gün insana öncə etdiyi və sonraya qoyduğu nə varsa (sağlığında dünyada gördüyü işlər və öləndən sonra qoyub getdiyi yaxşı, pis nə varsa, hamısı) xəbər veriləcəkdir!
75:14
بَلِ الْإِنسَانُ عَلَىٰ نَفْسِهِ بَصِيرَةٌ
Doğrusu, insan özü-özünə şahiddir!
75:15
وَلَوْ أَلْقَىٰ مَعَاذِيرَهُ
O, hər cür üzrxahlıq etsə də, (qəbul olunmaz)!
75:16
لَا تُحَرِّكْ بِهِ لِسَانَكَ لِتَعْجَلَ بِهِ
(Ya Peyğəmbər! Cəbrail sənə Qur’an oxuduğu zaman) onu tələm-tələsik əzbərləmək üçün dilini tərpətmə! (Sən də onunla birlikdə Qur’anı təkrar etmə, yalnız dinlə!)
75:17
إِنَّ عَلَيْنَا جَمْعَهُ وَقُرْآنَهُ
Çünki onu (sənin qəlbində) cəm etmək, (dilində) oxutmaq Bizə aiddir.
75:18
فَإِذَا قَرَأْنَاهُ فَاتَّبِعْ قُرْآنَهُ
Biz onu (Cəbrailin dili ilə) oxutduğumuz zaman oxunmasını diqqətlə dinlə.
75:19
ثُمَّ إِنَّ عَلَيْنَا بَيَانَهُ
Sonra onu (sənə) bəyan etmək də Bizə aiddir!
75:20
كَلَّا بَلْ تُحِبُّونَ الْعَاجِلَةَ
Xeyr, xeyr! Siz tez keçib gedəni (fani dünyanı) sevirsiniz.
75:21
وَتَذَرُونَ الْآخِرَةَ
Axirəti isə tərk edirsiniz.
75:22
وُجُوهٌ يَوْمَئِذٍ نَّاضِرَةٌ
O gün neçə-neçə üzlər sevinib güləcək,
75:23
إِلَىٰ رَبِّهَا نَاظِرَةٌ
Öz Rəbbinə baxacaqdır!
75:24
وَوُجُوهٌ يَوْمَئِذٍ بَاسِرَةٌ
O gün neçə-neçə üzlər tutulub qaralacaq,
75:25
تَظُنُّ أَن يُفْعَلَ بِهَا فَاقِرَةٌ
(Sahiblərinin) bel sümüklərinin (dəhşətli bir əzabla) qırılacağını anlayacaqdır!
75:26
كَلَّا إِذَا بَلَغَتِ التَّرَاقِيَ
Xeyr, (can) boğaza (körpücük sümüklərinə) gəlib yetişəcəyi,
75:27
وَقِيلَ مَنْ ۜ رَاقٍ
“(Onu bu bəladan) kim xilas edə bilər?” – deyiləcəyi,
75:28
وَظَنَّ أَنَّهُ الْفِرَاقُ
(Can üstə olan kimsə) ayrılıq dəminin gəlib çatdığını anlayacağı,
75:29
وَالْتَفَّتِ السَّاقُ بِالسَّاقِ
Və (ölüm qorxusundan) qıçı-qıçına dolaşacağı zaman,
75:30
إِلَىٰ رَبِّكَ يَوْمَئِذٍ الْمَسَاقُ
Aparılacağı yer Rəbbinin hüzuru olacaqdır (ey insan)!
75:31
فَلَا صَدَّقَ وَلَا صَلَّىٰ
Beləliklə, o (kafir Əbu Cəhl) nə (Qur’anı) təsdiq etdi, nə də namaz qıldı.
75:32
وَلَٰكِن كَذَّبَ وَتَوَلَّىٰ
Amma (Allah kəlamını) yalan saydı, (ondan) üz döndərdi.
75:33
ثُمَّ ذَهَبَ إِلَىٰ أَهْلِهِ يَتَمَطَّىٰ
Sonra da özünü darta-darta ailəsinin yanına getdi.
75:34
أَوْلَىٰ لَكَ فَأَوْلَىٰ
Vay sənin halına, vay!
75:35
ثُمَّ أَوْلَىٰ لَكَ فَأَوْلَىٰ
Yenə də vay sənin halına, vay!
75:36
أَيَحْسَبُ الْإِنسَانُ أَن يُتْرَكَ سُدًى
Məgər insan elə güman edir ki, o, başlı-başına (cəzasız) buraxılacaq?!
75:37
أَلَمْ يَكُ نُطْفَةً مِّن مَّنِيٍّ يُمْنَىٰ
Məgər o tökülən bir qətrə nütfə deyildimi?!
75:38
ثُمَّ كَانَ عَلَقَةً فَخَلَقَ فَسَوَّىٰ
Sonra laxtalanmış qan oldu və (Allah) onu yaradıb surət verdi (insan şəklinə saldı).
75:39
فَجَعَلَ مِنْهُ الزَّوْجَيْنِ الذَّكَرَ وَالْأُنثَىٰ
Sonra da ondan biri kişi, biri qadın olmaqla iki cift (həmtay) yaratdı.
75:40
أَلَيْسَ ذَٰلِكَ بِقَادِرٍ عَلَىٰ أَن يُحْيِيَ الْمَوْتَىٰ
Elə isə O Allah ölüləri diriltməyə qadir deyildirmi?!